O Programa Integrado de Emprego da Asociación de Empresarios Polígono San Cibrao rematou a súa 10ª edición (2024-2025) cun balance moi positivo. Dos 100 participantes, 72 traballaron en algún momento do programa e 59 continúan en activo, superando amplamente o obxectivo inicial do 45% de inserción laboral.
Formación adaptada ás necesidades produtivas
Nesta edición impartiuse máis de 550 horas de formación en 25 cursos, que incluíron soldadura MIG e TIG, administración, contabilidade, nóminas, xestión de almacén e ofimática, xunto con certificacións en prevención de riscos (manipulador de alimentos, carretillas, plataformas elevadoras, ponte grúa e traballos en altura).
Tamén se ofreceron talleres de procura de emprego dixital, ciberseguridade, robótica, mantemento informático, coaching e intelixencia emocional, así como asesoramento en autoemprego.
Prácticas e conexión co tecido empresarial
Un total de 23 participantes realizaron prácticas profesionais non laborais en empresas da contorna, reforzando a súa empregabilidade e creando vínculos directos coa industria. Paralelamente, desenvolveuse un intenso labor de prospección empresarial para axustar os perfís ás necesidades reais.
Premios e visitas
No acto de clausura entregáronse os Premios á Excelencia no Emprego, que recaeron en Sandra Costa Teixeira de Sousa e María Guadalupe González López. No eido empresarial, recoñeceuse a Coren polo seu compromiso coa inserción laboral.
A xornada finalizou con visitas á empresa Coasa e ao Edificio CEI do Parque Tecnolóxico de Galicia, referentes en innovación e emprendemento.
Aposta pola empregabilidade
Este éxito reafirma a aposta da Asociación de Empresarios Polígono San Cibrao pola formación e a empregabilidade como eixes clave para a competitividade empresarial e o desenvolvemento económico.