A Xunta de Galicia publicou hoxe no Diario Oficial de Galicia (DOG) a Orde do 16 de xaneiro de 2026, pola que se establecen as bases reguladoras das subvencións para apoiar iniciativas de emprendemento e se procede á súa convocatoria para a anualidade 2026 (código de procedemento TR880A).
O apoio ás persoas emprendedoras é clave para o desenvolvemento económico, a creación de emprego e o fortalecemento do tecido empresarial. Facilitar recursos nas primeiras fases dun proxecto empresarial resulta fundamental para que novas iniciativas poidan consolidarse.
Estas axudas están dirixidas a persoas traballadoras autónomas e pequenas e medianas empresas que iniciasen a súa actividade desde o 1 de xaneiro de 2024, co obxectivo de favorecer a consolidación de proxectos empresariais e fomentar un ecosistema emprendedor sólido e competitivo.
Entre os gastos subvencionables inclúense, entre outros, os gastos notariais e rexistris directamente vinculados á actividade, cun máximo de 300 euros por persoa beneficiaria, así como os gastos de alugueiro do local ou centro de traballo onde se desenvolva a actividade, cun máximo de 1.500 euros, cantidade que poderá incrementarse nun 10 % nos casos de remuda de negocio, unha ferramenta clave para evitar o peche de negocios viables.
Tamén se contemplan as reformas e habilitación das instalacións do local do negocio, sempre que se trate de reparacións simples, entendidas como obras de escasa complexidade técnica e baixo custo económico que non afecten á estrutura do inmoble. Para estes efectos, consideraranse reparacións simples aquelas investimentos cuxo importe non supere os 40.000 euros.
En ningún caso serán subvencionables as decoracións ou ornatos suntuosos, a adquisición de vehículos, naves ou aeronaves, nin outros gastos excluídos expresamente pola orde. Así mesmo, exclúese o domicilio habitual da persoa traballadora autónoma.
As axudas concederanse en réxime de concorrencia competitiva, cunha puntuación máxima de 30 puntos, valorándose distintos criterios económicos, territoriais e sociais.
As solicitudes deberán presentarse exclusivamente por vía electrónica desde o día seguinte á publicación no DOG ata o 2 de marzo de 2026.