O Diario Oficial de Galicia (DOG) publicou novas convocatorias de axudas da Consellería de Emprego, Comercio e Emigración, destinadas a impulsar o emprego, a contratación e a innovación en Galicia durante o ano 2026.
Estas axudas, articuladas a través dos programas Galicia Suma Talento – Emprégate, Investigo e Iniciativas de Emprego de Base Tecnolóxica (IEBT), supoñen unha oportunidade relevante para empresas, persoas autónomas e proxectos innovadores, especialmente en contornos empresariais como o Polígono de San Cibrao das Viñas.
Programa Galicia Suma Talento – Emprégate (TR342C)
O programa Galicia Suma Talento: Emprégate ten como obxectivo favorecer a contratación de persoas desempregadas na empresa ordinaria, especialmente aquelas con maiores dificultades de inserción laboral.
Persoas beneficiarias
Empresas e persoas empregadoras, calquera que sexa a súa forma xurídica, incluídas persoas autónomas, sociedades civís e comunidades de bens, con centros de traballo en Galicia. Tamén poden ser beneficiarios os centros especiais de emprego e as empresas de inserción laboral.
Incentivos á contratación
- Contratación indefinida inicial: entre 6.000 e 10.000 euros, con incrementos de ata un 85 % segundo condicións.
- Incremento de xornada de contratos indefinidos: 2.000 euros (3.000 € no caso de persoas con discapacidade).
- Ampliación da duración anual de contratos fixos descontinuos: 4.000 euros.
- Adaptación de postos de traballo para persoas con discapacidade: 1.000 euros.
- Transformación de contratos formativos en indefinidos: 5.000 euros.
Accións subvencionables
Contratacións e melloras realizadas entre o 1 de outubro de 2025 e o 30 de setembro de 2026.
Prazo de solicitude
Do 17 de febreiro de 2026 (9:00) ao 30 de setembro de 2026 (20:00), de forma telemática (TR342C).
Programa Investigo (TR349V)
O Programa Investigo está orientado á contratación de persoas mozas demandantes de emprego para o desenvolvemento de proxectos de investigación e innovación.
Persoas beneficiarias
Empresas privadas radicadas en Galicia, incluídas as iniciativas de emprego de base tecnolóxica, así como centros privados de I+D+i sen ánimo de lucro.
Actividade subvencionada
- Contratos indefinidos e a xornada completa, de 12 meses, para persoas mozas de 16 a 29 anos.
- Desenvolvemento de proxectos vinculados á transición ecolóxica, economía verde, dixitalización, enxeñaría de datos, RIS3 Galicia 2021–2027 e sanidade.
Contías
- Ata 22.405,92 € por persoa contratada (grupo de cotización 5).
- Ata 33.108,84 € por persoa e ano (grupos 1 a 4).
- Máximo de 3 contratos subvencionables por entidade.
Prazo de solicitude
Un mes desde o 17 de febreiro de 2026 (9:00), de forma telemática (TR349V).
Iniciativas de Emprego de Base Tecnolóxica – IEBT (TR340E)
Este programa apoia as empresas de base tecnolóxica que inicien a súa actividade en Galicia tras seren cualificadas como IEBT.
Persoas beneficiarias
Empresas privadas e persoas autónomas con domicilio social, fiscal e centro de traballo en Galicia, constituídas nun prazo máximo dun ano desde a cualificación como IEBT.
Principais axudas
- Creación de emprego estable: entre 6.000 e 12.000 euros por contrato indefinido, con incrementos acumulables.
- Axuda para o inicio da actividade: ata 24.000 euros.
- Axudas á conciliación: ata 3.000 euros.
- Apoio á función xerencial e á formación: ata 10.000 euros.
Prazo de solicitude
Do 17 de febreiro de 2026 (9:00) ao 30 de setembro de 2026 (20:00) (TR340E).
Un impulso clave para o tecido empresarial
Desde unha perspectiva empresarial e asociativa, estas axudas reforzan a creación de emprego estable, o aproveitamento do talento novo, a innovación e o crecemento de proxectos tecnolóxicos, contribuíndo ao fortalecemento do tecido produtivo e á competitividade das empresas galegas.