Hoxe, xoves 19 de febreiro, publícase no Boletín Oficial do Estado (BOE) o Real Decreto 126/2026, do 18 de febreiro, polo que se fixa o Salario Mínimo Interprofesional (SMI) para 2026, aplicable a todas as actividades na agricultura, na industria e nos servizos, sen distinción de sexo nin idade das persoas traballadoras.
Contía do SMI 2026
O salario mínimo queda establecido en:
- 40,70 euros ao día
- 1.221 euros ao mes
No salario mínimo computa exclusivamente a retribución en diñeiro. O salario en especie non pode dar lugar á minoración da contía íntegra en metálico.
O SMI está referido á xornada legal de traballo en cada actividade. Se se realiza unha xornada inferior, percibirase a parte proporcional correspondente.
Contratos de duración determinada
As persoas traballadoras con contratos de duración determinada cuxos servizos a unha mesma empresa non excedan de 120 días percibirán, xunto ao salario mínimo, a parte proporcional correspondente a domingos e festivos e ás dúas pagas extraordinarias.
En ningún caso a contía poderá ser inferior a 57,82 euros por xornada legal na actividade.
Empregadas e empregados do fogar
O salario mínimo das empregadas e empregados do fogar que traballen por horas, eventuais ou temporais queda fixado en:
- 9,55 euros por hora efectivamente traballada
Esta contía inclúe todos os conceptos retributivos.
Cómputo anual e estrutura salarial
O incremento do SMI non afectará á estrutura nin á contía dos salarios profesionais cando estes, no seu conxunto e en cómputo anual, sexan superiores ao salario mínimo fixado.
O salario mínimo en cómputo anual non poderá considerarse inferior a 17.094 euros.
Entrada en vigor
O Real Decreto entrará en vigor o venres 20 de febreiro de 2026, aínda que producirá efectos económicos desde o 1 de xaneiro ata o 31 de decembro de 2026, debendo aboarse con efectos retroactivos desde o inicio do ano.